Galicia atópase nun momento de cambios fundamentais. A sociedade está cambiando profundamente, tanto no económico como en aspectos máis íntimos do individuo, a relación entre as persoas, a súa forma de adquirir coñecementos e a calidade de vida. Esta revolución tecnolóxica trae da man unha revolución cultural, que fai da información e do coñecemento o verdadeiro motor do cambio social.
A sociedade do coñecemento non é en si mesma unha garantía de benestar, nin tan siquera de igualdade de oportunidades. Sen embargo, se se toman as decisións estratéxicas adecuadas, representa para Galicia unha nova oportunidade para tomar o tren do progreso. Por iso debemos apostar decididamente pola Educación e a Innovación coa convicción de que temos capacidade individual e como pobo, para facer fronte aos retos desa nova sociedade e gañar o futuro.
É necesario abordar solucións para superar os problemas da Educación a tódolos niveis, superando certos desánimos da comunidade educativa pola insuficiencia de recursos e proxectos destes últimos anos e recobrando a ilusión e a valoración dos nosos centros educativos.
Galicia non se debe resignar, senón que pola contra debe reaccionar reclamando espazo para as súas ideas, as súas innovacións, creacións, pensamentos, productos e mercancías. Para que isto sexa posible é necesario convencer e mobilizar a toda a sociedade galega a dar un avance considerable en investigación, desenvolvemento e innovación (I+D+i) que nos permita competir en mellores condicións nesta nova sociedade. É necesario dotar ás Universidades de recursos su.cientes para que poidan contribuír eficazmente ó progreso de Galicia, así mesmo é necesario acadar unha implantación real en tódolos eidos e territorios das tecnoloxías da información.
Galicia ten dereito a soñar que as súas contribucións ó acerbo cultural, científico e técnico no século XXI sexan superiores ás que foron no pasado século. A realidade deste soño sería a garantía do maior benestar socioeconómico dos galegos.
|
