Afrontando unha nova etapa en Galicia, cómpre tomar toda unha serie de medidas tendentes a producir o que empeza a ser o cambio social máis profundo do noso tempo actual: a equiparación real entre homes e mulleres e a eliminación de todo atisbo de desigualdade.
Homes e mulleres, mulleres e homes temos recoñecidos os mesmos dereitos. Pasouse, en poucos anos, dunha subordinación e discriminación legal a alcanzar cotas de cidadanía plena. A pesar destes avances e dos impulsos que teñen recibido, o próximo goberno da Xunta de Galicia deberá remover os obstáculos que impiden o libre exercicio dos dereitos xa recoñecidos.
O PP vendeu unha imaxe de preocupación polas mulleres galegas. Así, temos observado nestes anos grandes titulares acompañados dunha maquinaria mediática que anunciaban accións, medidas e planos para as mulleres, pero que moitas veces quedaron en proclamas baleiras de contido a de orzamentos, sen actuar contra a orixe do problema que non é outra que a desigualdade entre homes e mulleres. E cando o avance das mulleres se detén, a igualdade retrocede.
Non houbo unha resposta firme e contundente ante os principais problemas da muller galega e os colectivos máis discriminados:
• Situación de Discriminación Laboral.
• Falta de servizos sociais.
• Violencia de Xénero.
• Discriminación na vida social, pública e económica.
As políticas a as medidas promovidas pola Xunta foron insuficientes, improvisadas e cunha clara vontade paliativa. Non tiveron en conta a situación e a problemática heteroxénea das mulleres en Galicia, evidenciaron descoordinación e mostraron unha carencia de recursos económicos para acometelas.
O PSdeG pretende, con este programa de goberno, recoller as accións que permitan acadar unha realidade de igualdade de xénero real e cotiá.
Accións elaboradas e deseñadas con detemento e consenso, con realismo e experiencia, por expertos e expertas, asociacións de mulleres e máis de duascentas persoas convencidas da necesidade imperiosa de seguir avanzando en igualdade.
|
